Psa 62 | MMX | STEP | Nia a tu atnaasan to melamgo at ne Moroa, la a ngangais i xusu na lox asepsu ia, atla nenia a nuunu saga ren, la kopmen tara bok.

Psalms 62

Lunuunu Saga At Loklok Aratao At Ne Moroa

1 Nia a tu atnaasan to melamgo at ne Moroa, la a ngangais i xusu na lox asepsu ia, atla nenia a nuunu saga ren, la kopmen tara bok. 2 Neni xusuk ik kok avukar ia la ik lox asepsu ia; neni lentupe rak, la kopmen tara naba sev asubu ia.

3 Lavanisa aleng nemi lavamunepen mi vara i do mina esep eburu mi laradi kopmen tololos teren ngan loroboro i rem tereve si? 4 Mi vara mene i do mina lox asi i basinge nom loxot kitkis silok teren; mi lok momo rik lox asuusu levelinga xaxarang. Mi paase asu levelinga loklox anarong, ketla keneng at lebelen nimi mim doma ali nemnem saxaek tin.

5 Nia ak lok sogo xusuk mun at ne Moroa la nia amdoma ngangais tin. 6 Neni xusuk ik lok tatao ia la ik lox asepsu ia; neni i tupe ia la kopmen tinotno tara noxo sev asubu ia. 7 Nia a nuunu saga mun at ne Moroa, atla ik lox asepsu ia la i lox asilox ia; neni i ruuna lolos ngan Lurutu See Pe rak; neni i lok ngan Loogu Matmatkun i kubak pe ia. 8 Nemi limixin tarak. At levenaleng axap mina nuunu saga at ne Moroa. Mina tong asu levenmumuat atnemi rin, atla neni loxot loklox alipe atnedik.

9 Nemen gat mita nuunu saga at limixin atla di lok ngan mene legesa mamas silok laradi i mas abeles ka i. Limixin silok la lixilik di lok ngan levempanga gamasa mun. Do mina lok li di at lisikel, kopmen tumumuat atnedi; di balalak ngan mene lamamas gamasa. 10 Nemen gat mita doma i do mina sak paxat ka tempanga, la nemen gat mita doma i do mina ruuna ka tavanga at loklok tip kip pilo. Keke i dola lapnovos atnemi na sisilok; nemen mita doma saga solo ren.

11 Buaang levenaleng nia agara ronga vam ne Moroa ga tong i do, lolos axap, ateren mene, 12 la labalamu ren i tu amisik.

O Leeme Silok, nenu xusuk mun, um taba luunun ti legetgesa radi i epovo xa at leven gugu mi leveloklok teren.